День Республики в Табылды

Табылды ауылында Республика көнөнә арнап йәрминкә үткәрелде.
Байрамда ауыл халҡы үҙе етештергән продукцияһын тәҡдим итте. Бер-бер артлы теҙелгән өҫтәлдәрҙә нимә генә юҡ ине: йәшелсә, емеш-еләк, һөт, ҡымыҙ, ҡаймаҡ, май, эремсек, һепертке, миндек… Йәнең теләгән әйберҙе һатып алырға мөмкин булғандыр, моғайын, был көндө. Ә ауыл таланттарының концерты, иһә сараны тағы ла мәртәбәлерәк итте: Радмир Вахитов Фәдис Ганиев репертуарынан “Башҡортостаным” йыры, Ильнара Исмагилованың “Беләҙек” бейеүе, шулай ук Фәйрузә Гайсина һәм Венера Байгузиналарҙың дуэты, квартет башҡарыуында “Башҡортостан – Гөлбостан” йырҙары халыҡтың күңеленә хуш килде. Байрамға килгән һәр кем файҙалы аҙыҡ-түлек алып ҡына ҡалманы, шулай уҡ йыр-моң тыңлап, байрам сәйҙәрен эсеп рәхәтләнеп ял итте.
Эйе, тыуған ауылыбыҙ, республикабыҙ уңған кешеләре менән дан тота. Киләсәктә лә аяҙ күк, ҡояшлы көндәр, һаулыҡта, шатлыҡта тыуған төйәгебеҙгә дан йырлап тыныслыҡта йәшәргә яҙһын!