Кәкүк сәйенә сыҡтыҡ әле
7 июня 2023
“Һуң булһа ла, уң булһын” тип, йылда сыға торған Кәкүк сәйенә сыҡтыҡ әле.
Кәкүк сәйенә ғәҙәттә ҡатын-ҡыҙ, бала-саға сыға. Байрам үткәреү өсөн кәкүк тауышы ишетелеп торорлоҡ урын — Ерекле шишмәһен һайланыҡ. Аш-һыу әҙер булғансы бейеү, уйын-көлкө ойошторолдо. Унда «Аҡ тирәк-күк тирәк уйыны», «Наза», «Өсөнсөбөҙ — артыҡ», «һәпәләк» тигән һәм “Бесәй, сысҡан” уйындарын ,бала саҡты иҫкә төшөрөп уйнап алдыҡ. Табынға ултырышҡас, өлкән йәштәге апай-инәйҙәр йылдың матур килеүен, ашлыҡ-бесәндең уңыуын, илгә ырыҫ ҡуныуын, халыҡҡа иман ҡайтыуын теләп доға уҡыны. Аштан һуң уйын яңынан башланды. Унан сиратлашып кәкүктән йәш һорау, кәкүккә арнап сығарылған йырҙар башҡарып,ҡалған аҙыҡты кәкүккә һалып таралыштыҡ.
